AI醫療時代來矣、台灣蘭花 後一个20冬｜台灣記事簿
【AI醫療時代來矣】佇咱台灣，AI智慧醫療應用發展甲真緊，對病歷的紀錄、預測疾病風險到醫學院的學生訓練， 有 AI 的協助，予醫護人員省袂少體力佮時間。尤其是自動智能檢驗，這是全世界上新的技術， 逐工會當驗一萬支檢體！若準今仔日欲看門診，患者就毋免開時間等報告，走兩逝病院。AI 對醫療的幫助真大，毋過病醫原仔強調，AI 干焦是輔助的工具，終其尾醫療的決策是咱人類愛負責，目前咱台灣的法律猶未釐清「若 AI 診斷毋著」是啥人愛擔責任？醫師若準無確認過，就完全相信 AI 醫療建議，這可能就牽涉著醫療疏失，AI 立法是目前上重要的問題！
【台灣蘭花 後一个20冬】2023年台灣蘭花總外銷達到 1億9千7百外萬美金，蝴蝶蘭出口佔八成，超過1億5千9百萬美金，外銷國家以美國上濟6667萬美金，日本5712萬美金。面對國際情勢變化愈來愈大，業者講國際上蘭花的市場有咧成長，毋過競爭嘛變濟，希望政府協助逐家向外擴展市場；業者認為，毋但美國，越南嘛是設廠的選擇。台灣的蘭花產業二三十年來的發展，對種源、組織培養、種植技術和生產技術攏足穩定的，加上閣有國家的學術單位的協助，蘭花協會祕書長表示台灣有足大的競爭力量，蝴蝶蘭是唯一會當計畫生產的一个農作物！面對後一个 20 冬，除了佇品種研發繼續向前衝，嘛希望運用設備升級，佈局世界，予台灣蘭花的競爭優勢，跤步堅定，行佇咧國際上頭前！
7/6禮拜日暗時七點半，綴台灣記事簿先做來看AI醫療時代，落尾才閣來關注台灣蘭花的後一个20冬！
了解更多 →